Riekti duopmostuoluin geavahit sámigiela

Lágas (2009:724) nášuvnnalaš unnitloguid ja unnitlogugielaid birra čilgejuvvo riekti duopmostuoluin geavahit sámigiela. Dás logat oanehis dieđu makkár máŧolašvuođat leat duopmostuoluin geavahit sámigiela.

Duopmostuollodoaimmahat lea árvvoštallamis lohkan ahte láigohanlávdegoddi ja arrendelávdegoddi galgaba dán oktavuođas leat seamma lága vuolis go duopmostuolut.   

Makkár duopmostuoluin ja láigohan- ja arrendelávdegottiin sáhttá sámigiela geavahit?

Jos diggeáššis lea čanus soames dás máinnahuvvon suohkaniidda de sámigiela sáhttá geavahit hálddahuslašrievttis, diggerievttis, gittaopmodatduopmostuolus, birasduopmostuolus, jávreriektiduopmostuolus dahje láigohan- ja arrendelávdegottis main lea duopmogeavli mii ollásit dahje muhtin muddui gokčá Árjepluovi, Girona, Jåhkåmåhki dahje Váhtjera suohkaniid.

Sámigiela maid sáhttá geavahit dain duopmostuoluin gosa duopmu dahje mearrádus diggeáššis dahje áššis gos lea sáhttán geavahit sámigiela váidaluvvo.

Jos galgá sáhttit sámigiela geavahit de ferte diggeáššis dahje áššis leat čanus Árjepluovi, Girona, Jåhkåmåhki dahje Váhtjera suohkanii. Čanus sáhttá omd. leat ahte oassebealli lea dahje orru Árjepluovi, Girona, Jåhkåmåhki dahje Váhtjera gielddas dahje ahte diggeášši dahje ášši guoská gittaopmodahkii mii lea soames dáin suohkaniin.

Geas lea riekti sámigiela geavahit?

Oassebealis dahje oassebeali ovddasteaddjis diggeáššis dahje áššis duopmostuolus dahje láigohan- ja arrendelávdegottis lea riekti geavahit sámigiela diggeášši dahje ášši gieđahallamis. Ovddasteaddjin oaivvilduvvo omd. son gii lea máná hoaidi, luohttámuš-olmmái dahje son gii ovddasta juridihkalaš olbmo, muhto ii ovddasolmmái.

Maid riekti sámigiela geavahit duopmostuoluin ja láigohan- ja arrendelávdegottiin gokčá?

Riekti sámigiela geavahit gokčá rievtti guođđit áššečállosiid ja čálalaš duođaštemiid sámigillii, rievtti oažžut áššečállosiid mat gullojit diggeáššái dahje áššái njálmmálaččat jorgaluvvot sámigillii ja rievtti sámástit njálmmálaš áššejođiheamis duopmostuolus dahje láigohan- ja arrendelávdegottis. Duopmostuolut ja láigohan- ja arrendelávdegottit galget ruoŧagillii jorgalit áššečállosiid mat leat guđđojuvvon jos ii leat čielgasit dárbbašmeahttun.   Dát eiseválddit muđui maid galget rahčat dan guvlui ahte sámigielain gulahallet sámigielat oassebeliin dahje suinna gii oassebeali ovddasta. 

Buhtadus dulkii ja jorgalanbargui mákso almmolaš ruđain.

Goas galgá guođđit gáibádusa ahte sámigiela geavahit?

Duopmostullui ja láigohan- ja arrendelávdegoddái lea deaŧalaš ovddidit dulkka ja jorgaleaddji barggaheami. Gáibádus sámigiela geavahit galgá almmuhit dallego diggeášši dahje ášši álggahuvvo dahje dallego oassebealli vuosttas gearddi galgá vástidit. Gáibádusa oažžu hilgut jos dieđihuvvo maŋŋil dahje jos ipmirduvvo eahpeduođalaš áigumušain vuolggahuvvon.

 




Senast ändrad: 2010-03-02
Dela med andra Skriv ut